Անարդարություն եւ բարոյալքում
Հասարակությանն արագ բարոյալքելու, շատ արագ անտարբեր դարձնելու ամենակարճ ճանապարհն իշխանությունների կայացրած անարդար որոշումներն են եւ իրականացրած անարդար գործողությունները:
Ի դեպ, շատ հաճախ անարդարությունը փաթեթավորվում է գեղեցիկ եւ բարի մտադրությամբ:
Այն, որ մարտի 1-ի զոհերի ընտանիքները պետք է նյութական փոխհատուցում ստանային, այն, որ պետությւոնը նրանցից պետք է ներողություն խնդրեր՝ փաստ է: Այստեղ, կարծում ենք, երկու կարծիք լինել չի կարող:
2008թ. մարտի 1-2-ին տեղի ունեցած բախումների ժամանակ զոհված քաղաքացիների ընտանիքների անդամներին եւ տարբեր աստիճանի վնասվածքներ ստացած քաղաքացիներին աջակցություն տրամադրելու համար պետական բյուջեից կհատկացվի 720 միլիոն դրամ:
Երեւանի կենտրոնում զոհված քաղաքացիների հարազատներին որպես աջակցություն միանվագ կտրվի 30 մլն ՀՀ դրամ, առողջությանը ծանր վնաս հասցված անձին՝ 15 մլն ՀՀ դրամ, առողջությանը միջին ծանրության վնաս հասցված անձին՝ 5 մլն ՀՀ դրամ:
Հիմա չենք խոսում այն մասին, թե ինչու իրավապահ մարմինների վիրավորված ներկայացուցիչներն ինչու փոխհատուցում չեն ստանում, այլ ընդամենը մեկ հարց ենք տալիս, իսկ սահմանին զոհվածների, սահմանին վիրավորվածներին ով է փոխհատուցում տրամադրելու:
Տպավորություն է ստեղծվում, որ սահման պահելը, հայրենիք պահելը երկրորդական երրորդական գործ է, իսկ ինչ որ մեկին նախագահ դարձնելու համար բախումներ հրահրելն առաջնային գործ է:
Հիմա ծանոթանալով կառավարության որոշմանը սահմանին կորուստ ունեցած ընտանիքը, սահմանին վիրավոր ունեցած ընտանիքը լցվելու է անարդարության զգացումով, բարոյալքվելու է, դառնալու է անտարբեր այս երկրի նկատմամբ, հատկապես, երբ միաժամանակ հիշի, թե առողջապահության նախարար Արսեն Թորոսյանն ինչ է ասել սահմանին վիրավորված եւ հաշմանդամություն ձեռք բերած զինվորների մասին:
Աննա Բաղդասարյան
Top-News.am