Մաքուր օդից եք խոսում, բա խի՞ եք տանը ծխախոտով. Փաշինյանը նկատողություն արեց
Վարչապետ Նիկոլ Փաշինյանը Տարածքային կառավարման և ենթակառուցվածքների նախարար Սուրեն Պապիկյանի հետ Ջերմուկ է այցելել։
Ջերմուկում նրանք այցելում են բնակիչների բնակարաններ ու զրուցում նրանց հուզող հարցերի շուրջ։
Փաշինյանը քիչ առաջ զրուցում էր Ջերմուկի քաղաքապետ Վարդան Հովհաննիսյանի հետ և իր խոսքում նաև զարմանք արտահայտեց, թե մտնելով շենքեր՝ պարզել են, որ մի շենքը քաղաքապետինն է, իսկ մյուսը՝ նախկին մարզպետինը:
Մտնելով քաղաքացիներից մեկի տուն՝ նա նկատողություն արեց բնակչին՝ տանը ծխախոտով շրջելու համար: «Մաքուր օդից եք խոսում, բա խի՞ եք տանը ծխախոտով»,- նշեց վարչապետը:
Քաղաքացիներից մեկը Փաշինյանից հետաքրքրվեց, թե արդյո՞ք Ամուլսարի հանքի շահագործման դեպքում երկրաշարժի ժամանակ Սևանա լճին վնաս չի հասցվի, քանի որ Քննչական կոմիտեի եզրակացության մեջ նշված էր, որ այս դեպքում վնասը չափելի չի լինի՝ Փաշինյանը պատասխանեց. «Չափելի չէ, քանի որ դա շատ փոքր վնաս է լինելու և մինչ երկրաշարժը և երկրաշարժից հետո Սևանից վերցրած ջրի նմուշները համեմատելիս փոփոխություն չի լինի կամ կլինի շատ աննշան»։
Վարչապետը որպես օրինակ ներկայացրեց այն, որ եթե Սևանի մի ափին բեռնատար լվանան, ապա մյուս ափից ջուր որ վերցնեն, նմուշների մեջ տարբերություն չի լինի։