Ֆրանսիական քաղաքում փողոցի մեծ հատվածը գետնի տակն է անցել (տեսանյութ)
Ֆրանսիական Ամյեն քաղաքի կենտրոնական փողոցներից մեկում անսպասելիորեն 10 մետր տրամագծով և 5 մետր խորությամբ անդունդ է առաջացել:
Ինչպես հաղորդում է РИА Новости-ն՝ վկայակոչելով ֆրանսիական աղբյուրը, երկուշաբթի առավոտյան առաջացած փոսը գտնվում է La Bonne humeur բացօթյա ռեստորանի դիմաց՝ քաղաքապետարանի մոտակայքում: Քաղաքային ռելիեֆի վթարային հատվածը ցանկապատվել է անվտանգության շղթաներով:
Մոտակա տնից 3 բնակիչ է տարհանվել, նրանք ժամանակավորապես կացարան են գտել քաղաքային վարչության շենքում:
Նախնական տվյալների համաձայն՝ կատարվածի պատճառը ջրի արտահոսքն է, որը քայքայել է ասֆալտի տակի հողը: Նշվում է, որ քաղաքի կենտրոնում մինչև 200 քարանձավ կա, որոնք ժամանակին կազմել են Ամյենի տեղում գտնվող միջնադարյան ամրոցի մի մասը:
Միջադեպի հարակից շրջանում անջատվել են ջրի, գազի և էլեկտրականության մատակարարումները: