Իսկ ինչ գիտեն հայերը ցեղասպանության մասին
Մի քանի օր առաջ, իսկ ավելի ճիշտ ապրիլի 2-ին, երբ ընտրական հանձնաժողովներից մեկում պատրաստվում էին հաշվել քվեաթերթիկները, հանձնաժողովի ամենաերիտասարդ անդամներից մեկը հայտարարեց, թե այս ամենն իրեն, մեծ հաշվով, չի հետաքրքրում, եւ որ իր կյանքի նպատակն այն է, որ աշխարհը եւ Թուրքիան ճանաչի հայոց ցեղասպանությունը:
Վստահված անձ մի երիտասարդ էլ իր հերթին պնդեց, թե Թուրքիան արյան գին պետք է վճարի, եւ որ միջազգային դատարանն ի վերջո Թուրքիային ստիպելու է արյան գին վճարել: Երբ ինչ որ մեկը հետաքրքրվեց, թե այդ որ օրենսգրքում է գրված արյան գնի մասին եւ ինչ արժի այն, երիտասարդը քամահրանքով նայեց եւ ասաց՝ ափսոս, որ դուք այդ տարիքում եք եւ չգիտեք այդ մասին:
Երկու երիտասարդ, հազիվ 22-23 տարեկան հայտարարում են, որ ներկան իրենց չի հետաքրքրում, եւ որ իրենց կյանքի նպատակն այն է, որ աշխարհը եւ Թուրքիան ճանաչեն ցեղասպանությունը:
Պարզվեց, որ նրանք վստահ էին, որ ցեղասպանությունը տեղի է ունեցել 1915թ.՝ Արեւմտյան Հայաստանում: Երբ նրանց եւս մի քանի հարց ուղղեցինք, պարզվեց, որ նրանք համոզված են, որ թուրքերը 1915թ. ներխուժել են Արեւմտյան Հայաստան եւ բնաջնջել 1.5 միլիոն մարդու եւ զավթել մեր հողերը:
Բնականաբար, նրանք վստահ են, որ Թուրքերը պետք է վերադարձնեն այդ հողերը: Նրանք վստահ են, որ կոտորվել է ուղիղ 1.5 միլիոն մարդ:
Չկարծեք, թե այս երկու երիտասարդները բացառություն են: ՀՀ քաղաքացիների, հայ ժողովրդի գերակշիռ մասը նույն համոզմունքի են: Նրանք ցեղասպանության մասին մակերեսային գիտելիքներ ունեն: Սեւակի ստեղծագործության հիման վրա պնդում են, թե կոտորվել է 1.5 միլիոն մարդ, եւ որ Թուրքիան Արեւմտյան Հայաստանը գրավել է 1915թ.: Ամենակարեւորն այն է, որ շատ-շատերը վստահ են, որ ցեղասպանության ճանաչման դեպքում Թուքիան պարտավոր է վերադարձնել Խարբերդը եւ Վանը, Էրզրումը եւ Մանազկերտը:
Ահա սա է իրականությունը: Մենք աշխարհից պահանջում ենք ճանաչել ցեղասպանությունը, բայց ՀՀ քաղաքացիները ցեղասպանության եւ մեր պատմության մասին ունեն մակերեսային եւ կցկտուր գիտելիքներ:
Top-News.am