Հայաստանի ԱԽ քարտուղարը չի մասնակցի Լեռնային Ղարաբաղի ընտրական գործընթացներին
Հայաստանը կդառնա Լեռնային Ղարաբաղում արդար եւ թափանցիկ ընտրությունների անցկացման երաշխավորը: Այս մասին լրագրողների հետ զրույցում ասաց Հայաստանի Անվտանգության խորհրդի քարտուղար Արմեն Գրիգորյանը՝ հաստատելով օգոստոսի 5-ին Ստեփանակերտում տեղի ունեցած հանրահավաքում վարչապետ Նիկոլ Փաշինյանի ելույթի թեզերից մեկը:
Ի պատասխան այն հարցին, թե Հայաստանը կոնկրետ ինչպես է մտադիր դա իրականացնել, Գրիգորյանը նշեց, որ հիմա Արցախում քննարկվում է նոր ԸՕ-ն, եւ Հայաստանը նպաստել է նախագծի մեջ առավելագույն ժողովրդավարական մեխանիզմների ներդրմանը: Հարցին այն մասին՝ մտավախություններ չկա՞ն, որ նախընտրական շրջանում իրավիճակը կարող է վերահսկողությունից դուրս գալ, Արմեն Գրիգորյանը հավաստիացրեց, որ ընտրությունների հետ կապված լարվածություն չի սպասվում: «Արցախի բնակիչները կորոշեն, թե ով կընտրվի նախագահ եւ ով կմտնի խորհրդարան»,- հայտարարեց Գրիգորյանը:
ԱԽ ղեկավարին հիշեցրին իր ղարաբաղյան ծագումը եւ հետաքրքրվեցին ընտրություններին նրա հնարավոր մասնակցությամբ: Արմեն Գրիգորյանն ի պատասխան հայտնեց, որ հաշվառված է Հայաստանում, ուստի ոչ մի կերպ չի կարող ընտրություններին մասնակցել: