Չիկագոյի ամենաբարձր շենքի 103-րդ հարկում գտնվող դիտահարթակի ապակյա հատակը ճաքել է այցելուների աչքի առաջ (լուսանկարներ, տեսանյութ)
Չիկագոյի ամենաբարձր շենքի՝ Ուիլլիս Թաուեր աշտարակի 103-րդ հարկում գտնվող Skydeck դիտահարթակի ապակյա հատակը ճաքել է այցելուների աչքի առաջ և վախեցրել նրանց, գրում է Daily Mail-ը:
Ապակյա հատակով դիտահարթակը թույլ է տալիս այցելուներին ավելի քան 400 մետրից տեսնել քաղաքը:
Դիտահարթակի ապակյա հատակի ճաքելու ժամանակ դրա վրա գտնվել է զբոսաշրջիկ կին՝ երկու երեխաների հետ: Նրանցից ոչ ոք չի տուժել, սակայն մյուս այցելուները հրաժարվել են կանգնել դրա վրա:
Սա առաջին անգամը չէ, որ հատակը ճաքում է: Նման դեպք էր տեղի ունեցել նաև 2014 թվականին, սակայն այդ ժամանակ փորձագետներն ասել էին, որ դա վտանգ չի ներկայացնում, քանի որ ճաքում է ոչ թե հենց ապակին, այլ դրա վրայի պաշտպանիչ շերտը: