«Վաշինգտոնի նամակը չի ստիպի Թուրքիային հրաժարվել С-400-ներից». Չավուշօղլու
ԱՄՆ Պենտագոնի ղեկավարի պաշտոնակատար Պատրիկ Շանահանի նամակը Թուրքիայի կողմից ռուսական С-400 զենիթահրթիռային համալիրների ձեռքբերման վերաբերյալ չի ստիպի Անկարային հրաժարվել դրանցից, հայտարարել է Թուրքիայի արտգործնախարար Մևլութ Չավուշօղլուն: Այս մասին հաղորդում է РИА Новости-ն:
«Մենք չենք ասում, որ կգնենք С-400-ները, մենք արդեն գնել ենք դրանք: Եթե ԱՄՆ-ն դրանց և F-35-ների վերաբերյալ մտահոգություններ ունի, մենք առաջարկում ենք համատեղ աշխատանքային խումբ ձևավորել, և թող հարցը մասնագետները քննեն: Դոնալդ Թրամփն ասում է «այո», սակայն որոշ ամերիկյան գերատեսչություններ «ոչ» են ասում: Մենք այդ նամակից հետո չենք հրաժարվի С-400-ից, մենք պատրաստում ենք նամակի պատասխանը»,- ասել է Չավուշօղլուն:
Հունիսի 6-ին Շանահանն իր նամակում հայտնել էր, որ ԱՄՆ-ում F-35 կործանիչով թռչել սովորող թուրք օդաչուները պետք է հայրենիք վերադառնան մինչև հուլիսի 31-ը, իսկ նոր օդաչուներ երկիրը չի ընդունի:
Ավելի վաղ Անկարան հայտնել էր համալիրներից չհրաժարվելու հաստատակամության մասին: ԱՄՆ-ն իր հերթին սպառնում է չեղարկել F-35 կործանիչների վաճառքը Թուրքիային: