Երևանում աղբահանությունը լուրջ կվերահսկվի, «Սանիթեքի» հետ պայմանագրի լուծարման բազմաթիվ կետեր կան․ Հայկ Մարության
Մենք մեր կողմից արել ենք ամեն ինչ, սակայն «Սանիթեք» ընկերությունն այլևս կարողություն չունի սպասարկել Երևան քաղաքին։ Այսօր ԱԺ-ում լրագրողների հետ զրույցում նման տեսակետ հայտնեց Երևանի քաղաքապետ Հայկ Մարությանը։ Քաղաքապետը թերի սպասարկումը «Սանիթեքի» ցանկության հետ չի կապում, ըստ նրա, այլևս մեքենաների ու աշխատուժի քանակը չի բավարարում։
«Մեքենաների տեխնիկական վիճակը գրեթե հասել է 0-ի։ Նրանց խոսքով՝ իրենք օրական 12-18 մեքենա են հանում, բայց այդ մեքենաների մեծ մասը ճանապարհի կեսից խափանվում է, այսինքն՝ քիչ քանակությամբ մեքենաներ են սպասարկում քաղաքը, և այն, ինչ մենք տեսում ենք, զուտ դրա արդյունքն է»,- ասաց նա։
Մարությանի խոսքով՝ քաղաքապետարանը փորձել է օգնել «Սանիթեքին», սակայն ընկերությունը չի ցանկանում գումարներ ներդնել։ Որպես օրինակ բերեց նաև աղբամանները՝ հիշեցնելով, որ, ըստ պայմանագրի, պետք է լինի 8000 աղբաման, սակայն այսօր առկա է 5000-ը՝ այն էլ վատ վիճակում։
«Ասացի՝ եկեք ժամանակացույց կազմենք, որ սկսեք բերել, իրենք ասացին՝ շատ լավ, տվեցի 1500 աղբաման բերել, որ տարվա ընթացքում կբերեն։ 1500-ը շատ քիչ էր, բայց ասացինք, որ գոնե այսքանը լինի, բայց իրենք տապալեցին ժամանակացույցը և ուղղակի չբերեցին։ Այդտեղ հասկացա, որ եթե աղբամանը չի բերվում, ապա մեքենաների մասին խոսք անգամ լինել չի կարող։ Հասկանալով սա՝ մտել եմ կառավարություն, որ 5 աղբահանող մեքենա բերեն, որ իրավիճակը գոնե վերահսկելի լինի, բայց մենք պարզապես օգնում ենք «Սանիթեք»-ին»,- շարունակեց Մարությանը։
Քաղաքապետը հիշեցրեց, որ «Սանիթեք» ընկերությունը պայմանագրով պարտավորվում է իրականացնել Երևան քաղաքի ամբողջ սանմաքրումը, աղբահանությունը, ձնամաքրումը։ Նա շեշտեց՝ այլ որևէ ընկերություն իրավունք չունի անել, բայց քանի որ քաղաքապետարանի ուղիղ պարտականությունն է մաքրել քաղաքը, կողքից օգնում են։
Հարցին՝ «Սանիթեքի» հետ պայմանագիրը լուծարվելո՞ւ է, Հայկ Մարությանը պատասխանեց․ «Գիտեք, ժամանակը ցույց կտա, երբ վերջնական ստեղծենք բյուջետային հիմնարկը, պետք է գնահատենք այդ պահի իրավիճակը, քանի որ կարող է իրենք մեկ ամսվա մեջ 50-ից ավել մեքենա են բերում։ Բայց եթե չեն կարողանում պատշաճ կատարել աղբահանությունը, որը բխում միայն պայմանագրից, իսկ պայմանագրով ունենք բազմաթիվ կետեր, որոնցով կարող ենք լուծարել այդ պայմանագիրը»։
Հայկ Մարությանը հայտարարեց, որ ամեն ամիս «Սանիթեքին» տուգանում են թերի կատարած աշխատանքի համար, օրինակ՝ այս ամիս 26 մլն է տուգանվել, նախորդ ամիս՝ 13 մլն-ով և այլն։ Երևանի քաղաքապետը վստահեցրեց, որ առաջիկա ամիսներին Երևանում աղբահանությունը լուրջ կվերահսկվի, իսկ հունիսի վեջին Հայաստան կգան նոր մեքենաները։
«Ես կառավարությանը դիմել էի, մեկ անձից գնել էինք 5 «ԿամԱԶ» մակնիշի ավտոմեքենա, նախատեսվում էր գնել 34 ավտոմեքենա, ոչ միայն «ԿամԱԶ» մակնիշի։ Հունիսի վերջից սկսելու են մեքենաները գալ։ Այնպես որ, մոտակա ամիսներին իրավիճակը լրիվ վերահսկվելու է»,- եզրափակեց Հայկ Մարությանը։