Ռամիլ Սաֆարովն ամոթալի հանցագործություն է կատարել. Խաջիդա Իսմայիլովա
Ադրբեջանցի լրագրող Խաջիդա Իսմայիլովան իր ֆեյսբուքյան էջում գրառում է կատարել ԼՂ հակամարտության և Ռամիլ Սաֆարովի ազատ արձակման վերաբերյալ:
Ինչպես փոխանցում է 1news.az-ը, Իսմայիլովան գրել է, որ «ղարաբաղյան հակամարտությունը կանխամտածված կերպով երկարաձգում են, որպեսզի ծախսեն ռազմական բյուջեն և գումար վաստակեն»:
Իր գրառման մեջ լրագրողուհին նաև Ռամիլ Սաֆարովին անվանել է «ամոթալի հանցագործություն» կատարած անձ, որի ազատ արձակումը ոչ այլ ինչ էր, եթե ոչ նախընտրական քաղաքական խաղ: Նրա խոսքով՝ ադրբեջանցիները Սաֆարովի պատճառով միջազգային հանրության աչքերին երևում են որպես վայրենիներ:
Իսմայիլովայի այս գրառումը քննադատական մեկնաբանությունների տեղիք է տվել. շատերը նրան անվանել են հայրենիքի և ազգային շահերի դավաճան: