«Թրամփն ու Էրդողանը կարող են շուտով դեմ առ դեմ հանդիպում ունենալ»
Թուրքիայի նախագահ Ռեջեփ Թայիփ Էրդողանը և ԱՄՆ նախագահ Դոնալդ Թրամփը, հնարավոր է, շուտով ունենան դեմ առ դեմ հանդիպում, որը կկայանա կա՛մ Թուրքիայում, կա՛մ Ճապոնիայում «Մեծ քսանյակ»-ի գագաթնաժողովի շրջանակում:
Ինչպես նշում է Hurriyet Daily News-ը, այս մասին հայտարարել է թուրք բարձրաստիճան պաշտոնյաներից մեկը:
Պաշտոնյան, որը ցանկացել է անանուն մնալ, պարզաբանել է, որ Էրդողանը Թրամփին Թուրքիա է հրավիրել, և դրան ի պատասխան ամերիկյան կողմից «դրական ազդանշաններ» են ստացվել:
«Այժմ մենք աշխատում ենք հանդիպման օրը հստակեցնելու ուղղությամբ: Դրական ազդակներ կան, սակայն երկկողմ հանդիպման օրը չի որոշվել»,- հավելել է պաշտոնյան:
Հիշեցնենք, որ վերջին ամիսներին ԱՄՆ-ի ու Թուրքիայի հարաբերությունները սրվել են, ինչը պայմանավորված է Թուրքիայի կողմից ռուսական С-400 զենիթահրթիռային համակարգերի ձեռքբերմամբ:ԱՄՆ-ն Թուրքիային առաջարկում է մատակարարել ամերիկյան արտադրության Patriot համակարգը: