Վախթանգ Կիկաբիձեն ներկա չի լինի Դանելիայի հուղարկավորությանը
Վրացի հայտնի երգիչ և դերասան Վախթանգ Կիկաբիձեն հայտարարել է, որ ներկա չի լինի իր ընկերոջ՝ ԽՍՀՄ հայտնի կինոռեժիսոր Գեորգի Դանելիայի հուղարկավորությանը, որը տեղի կունենա վաղը՝ ապրիլի 9-ին: Նրա աճյունը կամփոփվի «Նովոդևիչյե» գերեզմանատանը:
«Հուղարկավորության արարողությունը տեղի կունենա վաղը: Ներկա չեմ լինի, քանի որ գտնվում եմ հիվանդանոցում»,- Կիկաբիձեի խոսքերն է մեջբերում «РИА Новости»-ն:
Ավելի վաղ արտիստը հայտնել էր, որ դիալիզի պրոցեդուրա է անցնում:
Հիշեցնենք, որ դերասանը 2008 թ. պատերազմից հետո հրաժարվել էր ելույթ ունենալ Ռուսաստանում՝ մերժելով անգամ իր 70-ամյա հոբելյանի կապակցությամբ այն ժամանակ ՌԴ նախագահ Դմիտրի Մեդվեդևի կողմից իրեն շնորհված «Բարեկամության շքանշանը»: Կիկաբիձեն իր արարքը բացատրել էր այն հանգամանքով, որ «չի կարողանում հաշտվել Ռուսաստանի կողմից Վրաստանի դեմ սանձազերծված պատերազմին»:
Դանելիան հոսպիտալացվել էր այս տարվա փետրվարի վերջին: Կինոռեժիսորը բժիշկներին էր դիմել շնչառության հետ կապված խնդիրների պատճառով: Նա գտնվում էր վերակենդանացման բաժանմունքում՝ թոքաբորբ ախտորոշումով: Դանիելիան մահացել էր ապրիլի 4-ին՝ 88 տարեկանում: