Ադրբեջանցուն ծնկի բերած տավուշցին իրավունք չունի ծնկի գալ ՀՀԿ-ի առաջ (Տեսանյութ)

Հարցազրույց պատգամավորի թեկնածու, քաղաքագետ Գեղամ Նազարյանի հետ:

- Պրն Նազարյան, դուք պատգամավորի թեկնածու եք առաջադրվել նաեւ ռեյտինգային ընտրակարգով եւ ներկայացնում եք թիվ 8 համարը ստացած «Օհանյան-Րաֆֆի-Օսկանյան» դաշինքը: Ինչու նման որոշում կայացրիք:

- Այո, նման որոշում եմ կայացրել միայն ու միայն այս հնարավորությունն օգտագործելու եւ տավուշցիներին կոչ անելու, որ ապրեն արժանապատիվ կյանքով եւ ոչ մի դեպքում ձայնը չվաճառեն եւ չքվեարկեն վախից ելնելով:

- Այսօր իրականությունը բոլորովին այլ է: Մարդիկ ընտրակաշառքի են սպասում եւ հաշտվել են իրենց վիճակի հետ:

- Ես համաձայն չեմ: Ոչ բոլորն են հուսահատ եւ ոչ բոլորն են ծախվելու: Տավուշցին, որ կարողացավ ծնկի բերել ադրբեջանցիներին, իրավունք չունի ծնկի գալ ՀՀԿ-ի առաջ:

- Բայց հիմա էլ ոմանք ասում են, թե ստիպված են քվեարկել բարեգործ Միքայել Վարդանյանին կամ անտառտնտեսության պետին կամ հայտնի բժկին,ասելով թե չընտրելն ամոթ կլինի, մարդիկ գործ ունեն արած:

- Շեշտեմ, որ մենք ԱԺպատգամավոր եւ ոչ թե բժիշկ կամ բարեգործ ենք ընտրում: Ավելացնեմ նաեւ, որ Միքայել վարդանյանն առաջադրված չէ,այլ առաջադրվել է մեկը որը ոչ քաղաքականության, ոչ էլ քաղաքագիտության հետ որեւէ կապ չունի: Իսկ եթե մտածում եք, որ անտառտնտեսության պետին ձայն չտալով այլեւս անտառից փայտ չեք կարող բերել,ապա սխալվում եք: 

- Դուք լավատեսորեն եք տրամադրվա՞ծ: Եւ ինչու պետք է ընտրողը քվեարկի թիվ 8 դաշինքին, ՕՐՕ դաշինքին եւ այնտեղ 4-րդ համարը ստացած Գեղամ Նազարյանին:

- Ես ուզում եմ, որ տավուշցին այնքան գումար ունենա, այնքան աշխատավարձ ստանա, որ երեխայի ուսման վարձը ինքը վճարի, եւ ոչ թե սպասի որ Միքայել Վարդանյանը կամ մեկ այլ մեծահարուստ վճարի, եթե իհարկե, հավես ունենա: Ես ցանկանում եմ, որ տավուցին իր եւ իր ծնողների բուժման համար գումար ունենա եւ գլուխը խոնհարած ուրիշից չվերցնի: Ես ուզում եմ, որ տավուշցին արժանապատիվ կյանքով ապրի: Նրանք, ովքեր ուզում են արժանապատիվ ապրել, նրանք էլ կընտրեն ՕՐՕ դաշինքին եւ ինձ: Մեր դաշինքը իշխանության գալու դեպքում շատ արագ երկիրն արմատապես կփոխի եւ մարդն էլ կապրի արժանապատիվ կյանքով: Ընտրությունը ձերն է տավուշցիներ: Միայն ավելացնեմ, որ ոչ անտառտնտեսության պետը, ոչ բժիշկը, որին ուզում են ոմանք օգտագործել ձայն խլելու համար, եւ առավել եւս անհայտ մեկը, որին Միքայել Վարդանյանը փորձում է պատգամավոր դարձնել, ձեր մատի փուշը չեն հանելու:

Եւ ամենակարեւորը ոչ մի դեպքում փող մի վերցրեք: փող վերցնելով ճորտ եւ ստրուկ եք դառնում առնվազն հինգ տարով:

Հարցազրույցը վարեց Աննա Բաղդասարյանը