«Մոսկվան արցունքներին չի հավատում». Պորոշենկոն կոչ է արել ուկրաինացիներին Պուտինի առաջ ծնկի չգալ
Ուկրաինացիները չպետք է ՌԴ նախագահ Վլադիմիր Պուտինի առաջ «արցունքն աչքերին» ծնկի գան ու ներողություն խնդրեն: Այդ մասին հայտարարել է Ուկրաինայի նախագահ Պյոտր Պորոշենկոն «ПРЯМИЙ» հեռուստաալիքի եթերում: Նախագահի ելույթի տեսանյութը հրապարակվել է նրա ֆեյսբուքյան էջում:
«Ուկրաինացիներին առաջարկում են ծնկի գալ, սողալ, լաց լինել ու Պուտինից ներողություն աղերսել: Հիշե՛ք՝ Մոսկվան արցունքներին չի հավատում»,- ասել է Պորոշենկոն:
Նա նաև հիշեցրել է «Ուկրաինական ապստամբ բանակ» ռազմական կազմակերպության օրհներգը, որում լաց չլինելու կոչեր են հնչում:
Պորոշենկոն այլընտրանք է առաջարկել. նրա խոսքով՝ ներկա պահին ՆԱՏՕ-ն ու Կիևը քննարկում են Ղրիմի վերադարձման մասին ծրագիրը:
Հիշեցնենք, որ ավելի վաղ Ուկրաինայի նախագահական մրցապայքարը գլխավորող շոումեն Վլադիմիր Զելենսկին բացատրել էր 2014թ.-ին Պուտինի առաջ ծնկի գալու պատրաստակամության մասին արած հայտարարությունը: Զելենսկիի խոսքով՝ ինքը նկատի է ունեցել այն, որ պատրաստ է եղել անգամ ծնկի գալ, «միայն թե ծնկի չբերեն Ուկրաինան»: Նախագահի թեկնածուն շեշտել էր, որ այսօր նույնպես պատրաստ է ամեն ինչի հանուն իր երկրի: