Զելենսկին բացատրել է, թե ինչու է պատրաստ ծնկի գալ Պուտինի առաջ
Ուկրաինայի նախագահական մրցապայքարը գլխավորող շոումեն, հումորիստ Վլադիմիր Զելենսկին բացատրել է Ռուսաստանի Դաշնության նախագահ Վլադիմիր Պուտինի առաջ ծնկի գալ պատրաստ լինելու մասին իր բառերը:
Ինչպես գրում է gazeta.ru-ն, Զելենսկին ընդգծել է, որ այդ բառերն ասել է 2014 թվականին՝ Ռուսաստանի և Ուկրաինայի միջև քաղաքական ճգնաժամի սկզբում:
Ըստ Զելենսկիի՝ նա հայտարարել է, որ պատրաստ է ծնկի գալ Պուտինի առաջ, «միայն թե ծնկի չբերեն Ուկրաինան»: Նախագահի թեկնածուն շեշտել է, որ այսօր նույնպես պատրաստ է ամեն ինչի իր երկրի համար:
Հիշեցնենք, որ Զելենսկին արդեն ավելի քան երկու ամիս գլխավորում է նախագահի թեկնածուների վարկանշային աղյուսակը: Նրան հետևում են գործող նախագահ Պորոշենկոն և «Հայրենիք» կուսակցության ղեկավար Յուլյա Տիմոշենկոն:
Ուկրաինայի նախագահական ընտրությունները կկայանան մարտի 31-ին: Երկրի ղեկավարի պաշտոնին 44 թեկնածու է հավակնում: