Պեսկովը հայտնել է, թե ում նախաձեռնությամբ է կայացել Նազարբաևի հրաժարականին նախորդած հեռախոսազրույցը
Նուրսուլթան Նազարբաևն անձամբ է զանգահարել Ռուսաստանի նախագահ Վլադիմիր Պուտինին նախքան Ղազախստանի նախագահի պաշտոնից հրաժարական տալը: INTERFAX.RU-ի փոխանցմամբ՝ այս մասին հայտարարել է ՌԴ նախագահի մամլո քարտուղար Դմիտրի Պեսկովը:
«Այո, Նուրսուլթան Նազարբաևն ինքն է զանգահարել: Նրանք իրականում հաճախակի են հեռախոսով զրուցում, դա միշտ է այդպես եղել վերջին տարիներին: Եվ զանգահարել է նա` հայտարարություն անելուց ժամեր առաջ», - ասել է Պեսկովը Россия 1 հեռուստաալիքի եթերում:
Վերջինս ընդգծել է, որ Ռուսաստանի և Ղազախստանի միջև հարաբերությունները բարձր մակարդակով կշարունակվեն առաջիկայում: «Ղազախստանը Ռուսաստանի կարևոր գործընկերն է, այդ իսկ պատճառով կասկած չկա, որ առաջիկայում էլ հարաբերությունները կծավալվեն բարձր մակարդակով», - շեշտել է Դմիտրի Պեսկովը:
Հիշեցնենք, որ Նազարբաևը 30-ամյա ղեկավարումից հետո մարտի 19-ին հայտարարել է երկրի նախագահի լիազորությունները վայր դնելու մասին: Նրան այդ պաշտոնում փոխարինել է Ղազախստանի խորհրդարանի վերին պալատի նախագահ Քասիմ Ժոմարտ Տոկաևը: