Վենեսուելայում հայտարարել են, որ դեղերի պակասը գերազանցում է 85 տոկոսը
Վենեսուելայում անհրաժեշտ դեղամիջոցների և բժշկական պարագաների խիստ պակաս է զգացվում: ТАСС գործակալության փոխանցմամբ՝ նման պնդումներով շաբաթ հանդես է եկել առողջապահության ոլորտի աշխատակիցների միության գործադիր քարտուղար Պաբլո Սամբրանոն:
«Դեղերի պակասը գերազանցում է 85 տոկոսը, իսկ բժշկական պարագաներինը՝ 90 տոկոսը, նկատվում է ենթակառուցվածքների զգալի վատթարացում: Չկան համակարգչային շերտագրություն իրականացնելու սարքեր», -Սամբրանոյին մեջբերում է տեղի աղբյուրը: Նրա խոսքով՝ երկրում այլևս անվճար բուժօգնություն ստանալու հնարավորություն չկա:
Երկրի նախագահ Նիկոլաս Մադուրոն ավելի վաղ հայտարարել էր, որ ազգային դեղագործական արդյունաբերությունն առաջիկա ամիսներին կկարողանա բավարարել բնակչության համար անհրաժեշտ դեղերի մինչև 70 տոկոսը: