Ռուսաստանում ապտակելու սիրողական մրցույթ է անցկացվել (տեսանյութեր)
Ռուսաստանի Դաշնության Կրասնոյարսկ քաղաքում կայացել է երկրում ապտակելու առաջին սիրողական մրցումը, որի ժամանակ մասնակիցները մինչև հակառակորդին նոկաուտի հասցնելը ապտակել են միմյանց:
Ինչպես նշում է Oddity Central հարթակը, համանման մրցույթ անցկացվել է նաև անցած տարի՝ Մոսկվայում, սակայն դրան մասնակցել են միայն պրոֆեսիոնալ մարզիկները:
Այս տարի մրցույթի կազմակերպիչները մասնակցության հնարավորություն են ընձեռել նաև իրենց ուժերը փորձել ցանկացող ոչ պրոֆեսիոնալ անձանց: Արդյունքում մասնակիցներից շատերը պատահական տղամարդիկ են եղել:
Մրցակիցները, կանգնելով սեղանիկի տարբեր կողմերում, ապտակներ են հասցրել միմյանց: Եթե երեք ապտակից հետո մասնակիցներից ոչ մեկը նոկաուտի չի ենթարկվել, մրցավարը հաղթողի կոչումը շնորհել է ապտակի ուժի և տեխնիկայի հիման վրա:
Լուրջ վնասվածքներից խուսափելու համար մասնակիցներին թույլատրվել է ապտակել միայն ափի վերին մասով, բացի այդ՝ արգելվել է թիրախավորել հակառակորդի քունքերը, ականջներն ու աչքերը:
Սիրողական մրցույթում քաշային կարգեր չեն եղել, ինչը թույլ է տվել 168 կգ կշռող Վասիլի Կամոցկիին հեշտությամբ տիրանալ հաղթողի տիտղոսին:
Ֆիտնեսի սիրահարի հակառակորդները հիմնականում ֆիզիկական ուժի առումով մեծապես զիջել են նրան: Վասիլին որպես մրցանակ 30 հազար ռուբլի է ստացել, ինչպես նաև ապտակելու պրոֆեսիոնալ մրցույթին մասնակցության հրավեր: