Մակրոնի նախկին օգնականին ապօրինի զենք կրելու մեղադրանք է ներկայացվել
Ֆրանսիացի քննիչները նոր մեղադրանքներ են ներկայացրել Ֆրանսիայի նախագահ Էմանուել Մակրոնի նախկին օգնական Ալեքսանդր Բենալային, այդ թվում եւ ապօրինի զենք կրելու համար։ Այս մասին տեղեկացրել է France Info ռադիոկայանը՝ հղում կատարելով դատական աղբյուրներին։
Նրա տվյալներով՝ «B կարգի զենքի ապօրինի կրման» մեղադրանքի հարուցման պատճառը Բենալայի սելֆին է 2017 թվականի նախագահական ընտրարշավի ժամանակ։ Չի ճշտվում, թե հատկապես ինչ զենք է նա ունեցել։ Բայց ավելի վաղ լրատվամիջոցներում հրապարակված լուսանկարից երեւում է, որ դա կարող էր ատրճանակ լինել։
Ըստ աղբյուրների՝ Բենալային նաեւ մեղադրում են «միտումնավոր բռնության» եւ «պետական ծառայությունների գործունեությանը միջամտելու» մեջ՝ Փարիզում 2018-ի մայիսմեկյան ցույցի ժամանակ տեղի ունեցած միջադեպի հետաքննության համատեքստում, տեղեկացնում է ՏԱՍՍ-ը։
2018 թվականի օգոստոսին Բենալան ազատվել է Ֆրանսիայի նախագահի աշխատակազմից՝ Փարիզի մայիսմեկյան ցույցի մասնակիցներին ծեծելու մեղադրանքների հետ կապված։