Հայաստանը եւ Արցախը հակամարտության կարգավորման հարցում հակասություններ չունեն
Հայաստանի եւ Արցախի դիրքորոշումներում հակասություններ չկան հակամարտության կարգավորման հարցում։ Այս մասին մարտի 20-ին մամուլի ասուլիսում ասել է Հայաստանի ԱԳՆ մամուլի քարտուղար Աննա Նաղդալյանը։
Պատասխանելով հարցին, թե Լեռնային Ղարաբաղի ԱԳՆ ղեկավար Մասիս Մայիլյանի արտահայտած դիրքորոշումը ԵԱՀԿ գործող նախագահ Միրոսլավ Լայչակի հետ հանդիպումից հետո տոնայնությամբ փոքր-ինչ տարբերվում է Հայաստանի ղեկավարության հայտարարություններից, ԱԳՆ մամուլի քարտուղարը նշեց, որ Արցախն իր տեսակետն ունի։ «Կան արդյոք հակասություննե՞ր՝ ոչ։ Մենք համագործակցում ենք արցախցի գործընկերների հետ եւ քննարկում բոլոր հարցերը»,- նշել է մամուլի քարտուղարը՝ հավելելով, որ ավելի մանրամասն վերջերս մեկնաբանել է Հայաստանի ԱԳՆ ղեկավարը։ Ինչ վերաբերում է Փաշինյան-Ալիեւ գալիք հանդիպման օրակարգին, ապա Հայաստանի վարչապետը Հայաստանի եւ Արցախի ԱԽ համատեղ նիստում ասել է, որ հանդիպումն ուղղված կլինի սկզբունքների եւ տարրերի պարզմանը։
Երեկ մամուլի ասուլիսում վարչապետը կրկնել է ավելի վաղ՝ ԱԽ համատեղ նիստում արտահայտածը. կան երեք սկզբունք եւ վեց տարր, որոնց շուրջ կողմերը սեփական մեկնություններ ունեն։ Անհրաժեշտ է գալիք հանդիպման համար մշակել բոլորի համար ընդունելի մոտեցում,- նկատել է մամուլի քարտուղարը։