Մաուգլի աղջիկը սկսել է խոսել (տեսանյութ)
Հնգամյա «աղջիկ-մաուգլին», որին իրավապահները գտել էին Մոսկվայի բնակարաններից մեկում լքված վիճակում և աղբակույտերի մեջ, սկսել է խոսել: Երեխան առաջինը շփվել է բժիշկների հետ, որոնց վերահսկողության տակ էլ գտնվում է այժմ։ Այս մասին հաղորդում է «Մոսկվա» լրատվական գործակալությունը։
Հիշեցնենք, որ աղջիկը, որը երկար ժամանակ միայնակ էր մնացել աղբակույտերով լի բնակարանում, չէր խոսում ու չափից դուրս հյուծված էր։ Հայտնի է նաև, որ բժիշկները վիրահատական միջամտությամբ հեռացրել են երեխայի վզի մաշկի մեջ ներաճած պարուրաձև մազակալը։
Լրատվամիջոցների փոխանցմամբ՝ 5-ամյա աղջիկը խոսում է գրեթե շշուկով, նա գիտի որոշ կենդանիների անուններ, իսկ առաջին բառը, որ հիվանդանոց տեղափոխվելուց ի վեր նրանից լսել են, վերաբերել է մուլտֆիլմերից մեկի հերոսին։
«Սա Ֆունտիկն է», - ասել է երեխան։
Նշենք, որ երեխայի մայրը ձերբակալվել է, նրան մեղադրանք է առաջադրվել անչափահասի դեմ մահափորձի հոդվածով, թեև կինն իրեն հասցեագրված մեղադրանքը չի ընդունում։