Ճապոնիայում ծնողներին օրենքով կարգելեն ծեծել երեխաներին
Ճապոնիայի կառավարությունը հավանության է արժանացրել երեխաների նկատմամբ դաժան վերաբերմունքի մասին օրենքում փոփոխություններ մտցնելու նախագիծը, այս մասին գրում է The Japan Times-ը։
Նշվում է, որ նոր փոփոխություններն արգելք են սահմանում անչափահասների հանդեպ ֆիզիկական պատժի ցանկացած ձևի նկատմամբ։ Դրանք արգելված կլինեն թե՛ ծնողներին, թե՛ խնամակալներին ու մոտ հարազատներին և թե՛ երեխաների հետ շփվող սոցաշխատողներին։
Փոփոխությունները քննարկման կդրվեն երկրի խորհրդարանում ապրիլի 1-ին։
Աղբյուրը նկատում է, որ առկա օրենքում փոփոխություններ մտցնելու անհրաժեշտությունն օրակարգ է մտել սարսափելի դեպքից հետո, երբ հայրը սպանել էր դստերը։ Հայտնի է, որ աղջիկը պարբերաբար հայտնել է համապատասխան մարմիններին ընտանիքում առկա բռնության մասին, սակայն երեխային պաշտպանության տակ առնելու համար որևէ քայլ չի ձեռնարկվել։