Ոստիկանությունը ձերբակալել է Ուտրեխտում տեղի ունեցած հրաձգության երրորդ կասկածյալին
Հոլանդիայի ոստիկանությունը ձերբակալել է Ուտրեխտում տրամվայում տեղի ունեցած հրաձգության երրորդ կասկածյալին, որի հետեւանքով մահացել է 3 մարդ: Այս մասին հաղորդել է Նիդերլանդների հեռուստառադիոհեռարձակման կորպորացիան, հաղորդում է ՏԱՍՍ-ը:
«Ձերբակալվել է երրորդ մարդը, դեռ անհայտ է, թե ինչ առնչություն է նա ունեցել միջադեպին», -նշել է հեռուստաալիքը: Ավելի վաղ հաղորդվել էր երկու անձի ձերբակալման մասին, այդ թվում հրաձգությունն իրականացրած Գյոկմեն Տանիշի:
Ըստ Նիդերլանդների հեռուստառադիոհեռարձակման կորպորացիայի՝ հարձակվողը դեռ երկու շաբաթ առաջ ձերբակալված էր: Նա ընդգրկված էր երեք գործերում՝ հեծանիվի գողության, կողոպուտի եւ բռնաբարության: Մի շարք ԶԼՄ-ներ, վկայակոչելով Տանիշին իմացած անձանց, նաեւ պնդում են, որ նա հոգեբանական խնդիրներ է ունեցել եւ թմրանյութեր է օգտագործել:
Ըստ ոստիկանության տվյալների՝ երկուշաբթի, օրվա երկրորդ կեսին Ուտրեխտում տեղի ունեցած հարձակման արդյունքում երեք մարդ է մահացել, եւս 5-ը վիրավորվել: Բոլոր տուժածները տեղափոխվել են հիվանդանոցներ, նրանց անհրաժեշտ օգնություն է տրվում:
Ըստ բժիշկների՝ երեք մարդ ծանր վիճակում է: Թե ինչ շարժառիթներով է առաջնորդվել Գյոկմեն Տանիշը, դեռ պարզ չէ:
Իրավապահ մաարմինները չեն բացառում, որ հարձակվողը ահաբեկչական նպատակներ ուներ, սակայն կան նաեւ ենթադրություններ, որ հարձակումն իրականացվել է ընտանիքի հետ կապված պատճառներով:
Նիդերլանդների վարչապետ Մարկ Ռյուտեի կարգադրությամբ՝ երեքշաբթի բոլոր պետական շենքերի դրոշներն իջեցվել են ի նշան հարգանքի զոհերին եւ նրանց հարազատներին:
Ազգային խորհրդարանի ստորին պալատը մտադիր է երեքշաբթի մեկ րոպե լռությամբ հարգել ողբերգության զոհերի, ս նաեև Նոր Զելանդիայում ահաբեկչության հետեւանքով մահացածների հիշատակը: Արարարողությանը նախատեսվում է վարչապետի ներկայությունը: