Արևմուտքը քննադատում է Մոսկվային Ղրիմի բռնակցման հինգերորդ տարվա կապակցությամբ
Եվրամիությունն ու Միացյալ Նահանգները Ղրիմի բռնակցման հինգերորդ տարվա կապակցությամբ հայտարարություններ են տարածել՝ վերստին ընդգծելով, որ ճանաչում են Ուկրաինայի տարածքային ամբողջականությունը:
Եվրամիության բանաձևը հրապարակել է կառույցի արտգործնախարար Ֆեդերիկա Մոգերինին, ընդգծելով՝ «բռնազավթումը ուղիղ մարտահրավեր է միջազգային անվտանգությանը, և որ Եվրամիությունը շարունակելու է Ղրիմի բռնակցումը չճանաչելու իր քաղաքականությունը, այդ թվում՝ պատժամիջոցների միջոցով»:
ԵՄ փաստաթուղթը նաև քննադատում է անցած նոյեմբերին Ազովի ծովում Ռուսաստանի զինուժի կողմից ուկրաինական նավերի վրա կատարված հարձակումը, ինչպես նաև Ղրիմի կամրջի կառուցումը՝ առանց Ուկարինայի համաձայնության:
Պետդեպարտամենտը իր հերթին հայտարարել է՝ 2014 թվականի մարտի 16-ին Ղրիմում տեղի ունեցած հանրաքվեն «անօրինական ֆարս էր, որն անցկացվել է հրազենի փողերի սպառնալիքի տակ»:
Մինչ Արևմուտքը դատապարտում է և խստացնում պատժամիջոցները Մոսկվայի նկատմամբ՝ թերակղզու բռնակցման համար, Ռուսաստանի իշխանությունները Ղրիմում շքերթներ ու տոնական հանդեսներ են անցկացնում, իրենց խոսքով, «վերամիավորումը» տոնելու համար: