Ինչո՞ւ հենց հիմա քանդեցին սրճարանները
Երբ օրեր առաջ էքսկավատորներով, բուլդոզերներով զինված քաղաքապետարանի աշխատակիցները հայտնվեցին Ազատության հրապարակում եւ սկսեցին ապամոնտաժել մի քանի սրճարան, շատերի մոտ հարց առաջացավ՝ ինչո՞ւ հենց հիմա:
Իհարկե, առավել միամիտները եւ լավատեսները շտապեցին ասել, թե հիմա, քանի որ գարուն է գալիս, եւ մինչեւ ծառերը կկանաչեն, խոտը դուրս կգա, պետք է հասցնել կանաչապատել տարածքը:
Ցավոք, շտապողականությունը կանաչապատման հետ որեւէ կապ չունի: Ավելին, անգամ քաղաքապետարանն է հաստատում, որ իրենք Ազատությայն հրապարակին հարող տարածքը մտադիր չեն ազատել բոլոր սրճարաններից:
Այսպիսով, ստացվում է, որ սրճարանների արագ ապամոնտաժումը բոլորովին այլ նպատակ է հետապնդում, քան կանաչապատումն է: Իսկ նպատակը մեկն է՝ ՀՀ քաղաքացիների ուշադրությունը շեղել Արցախի հարցից:
Ի դեպ, սրճարանների ապամոնտաժման աղմուկ-աղաղակի մեջ շատերը չնկատեցին, որ Մինսկի խմբի համանախագահները ժամանեցին Երեւան, բանակցեցին, գնացին եւ սկսեցին նոր թափով նախապատրաստել Փաշինյան-Ալիեւ հանդիպումը:
Իսկ սրճարաններով ժողովրդի ուշադրությունը շեղեցին, քանի որ Արցախի հարցում իշխանություններն իրենք իրենց մտցրել են մի շատ անհարմար տեղ, որից պետք է դուրս գան հնարավորինս անաղմուկ եւ ժողովրդի աչքից հեռու:
Այսպես է լինում, երբ առանց երկար եւ լուրջ նախապատրաստական աշխատանքի, առանց բանակցությունների, առանց դիրքորոշումների ճշգրտման բանակցությունների ձեւաչափի փոփոխման վերաբերյալ արմատական հայտարարություններ են արվում: Նման քայլերն աշխարհը չի ընդունում եւ չի ողջունում:
Սա է իրականությունը եւ հիմա ժողովուրդը դեռ երկար ժամանակ կխոսի սրճարաններից, ոմանք կհավատան, թե կարգին քաղաքապետը մտադիր է վերականգնել Ազատության հրապրակի1987թ տեսքը, ոմանք կհավատան, որ ապամոնտաժվելու են Երեւանի զբոսայգիների բոլոր կառույցները, իսկ իրականությունը բոլորովին այլ է:
Ընդամենը ժողովրդի աղմուկ-աղաղակը պետք է օգնի իշխանություններին հնարավորինս անաղմուկ եւ ծածուկ դուրս գալ այն անհարմար իրավիճակից, որում իշխանություններն իրենց դրել են չմտածված եւ հուզական հայտարարությունների պատճառով:
Վարդան Մխիթարյան
Top-News.am