Հայկական անունով մարդիկ հաճախ հավելյալ ստուգումների են ենթարկվում սահմանն անցնելիս. ԱՄՆ Պետդեպը դատապարտել է Ադրբեջանին խտրական վերաբերմունքի համար
ԱՄՆ պետքարտուղարությունը Մարդու իրավունքների հարցով իր ամենամյա զեկույցում անդրադարձել է 2018-ին Ադրբեջանում տեղի ունեցած մարդու իրավունքների խախտումներին:
Պետքարտուղարության զեկույցում, մասնավորապես, նշվում է հայկական ծագում ունեցող անձանց նկատմամբ իրականացվող հավելյալ ստուգումների կամ երկիր մուտք գործելու արգելքի մասին:
«Հայկական անուններով մարդիկ հաճախ ենթարկվում են հավելյալ ստուգումների սահմանն անցնելիս և պարբերաբար մերժում են ստանում երկիր մուտք գործել: Քաղաքացիական հասարակության ակտիվիստները պնդում են, որ մի ողջ սերունդ է մեծացել՝ լսելով հայերի դեմ ուղղված ատելության խոսքը», - ասվում է Պետքարտուղարության զեկույցում:
Զեկույցում նշվում է նաև, որ ակտիվիստների փոխանցմամբ՝ երկրի կառավարությունն էթնիկ փոքրամասնություններին, ինչպես օրինակ՝ թալիշներին և լեզգիներին, դասագրքեր չի տրամադրում նրանց մայրենի լեզուներով: