Կոռուպցիայի դեմ պայքարից մինչեւ նոր Քրեական օրենսգիրք. ԵԽԽՎ համազեկուցողները Հայաստանում
Մարտի 14-ին Ազգային ժողովում տեղի է ունեցել Պետաիրավական հարցերի մշտական հանձնաժողովի անդամների հանդիպումը Եվրոպայի խորհրդի Խորհրդարանական վեհաժողովի՝ Հայաստանի գծով մոնիթորինգային հանձնաժողովի համազեկուցողներ Յուլյա Լեւոչկինայի, Անդրեյ Շիրցելի, հանձնաժողովի քարտուղար Ալեքսիս Սալանսոնի եւ Երեւանում Եվրախորհրդի գրասենյակի ղեկավար Նատալյա Վուտովայի հետ, տեղեկացնում է NEWS.am-ի թղթակիցը։
Հանդիպման ընթացքում քննարկվել են հակակոռուպցիոն բարեփոխումները, որոնք իրականացվում են Հայաստանում, ինչպես նաեւ նոր Քրեական օրենսգրքի ընդունման հարցերը։ Պետաիրավական հարցերի խորհրդարանական հանձնաժողովի նախագահ, «Իմ քայլը» կառավարող խմբակցության պատգամավոր Վլադիմիր Վարդանյանի խոսքով՝ այդ հարցերը Հայաստանի խորհրդարանի օրակարգում են եւ կարեւոր են համարվում։ «Մասնավորապես, մշակվում է համապատասխան իրավաբանական բազա կոռուպցիայի դեմ պայքարի համար»,- պարզաբանել է Վարդանյանը։