Թմրաբարոնը դատի է տվել Մեքսիկայի նախկին նախագահին
«Գաճաճ» մականունով հայտնի թմրաբարոն Խոակին Գուսման Լոերայի պաշտպանությունը Մեքսիկայի գլխավոր դատախազություն է դիմել քրեական հայցով ընդդեմ Մեքսիկայի նախկին նախագահ Էնրիկե Պենյա Նյետոյի՝ կապված ԱՄՆ նրա արտահանձնմանը նախորդած դատավարական խախտումների հետ, հայտնել է նրա փաստաբան Խոսե Լուիս Մեսան, փոխանցում է Politica Online-ը:
Գաճաճին բռնել էին 2016 թվականին Պենյա Նյետոյի վարչակազմի օրոք, իսկ մեկ տարի հետո հանձնել ԱՄՆ-ին, որտեղ մի քանի նահանգներ անմիջապես նրան մեղադրանքներ էին առաջադրել ԱՄՆ կոկաին մատակարարելու, ապօրինի զենք պահելու եւ սպանություններ կազմակերպելու համար: Վերջերս Նյու Յորքի դատարանը Գուսմանին մեղավոր էր ճանաչել մեղադրանքի բոլոր 10 կետերով, նրան սպառնում է ցմահ ազատազրկում:
Ըստ Գաճաճի փաստաբանի՝ մի շարք սխալներ են թույլ տվել ինչպես Պենյա Նյետոյի կառավարությունը, այնպես էլ ԱՄՆ-ում:
Նրա կարծիքով՝ Գաճաճը պետք է տարվեր Մեքսիկային սահմանակից Կալիֆոռնիա կամ Տեխաս, սակայն նրան Նյու Յորք են տարել, որով խախտել են Մեքսիկայի եւ ԱՄՆ-ի միջեւ ստորագրված արտահանձնման մասին համաձայնագիրը: Դրանից բացի, արտահանձնումից առաջ չի պահպանվել Գաճաճին կալանավորելու հիմք դարձած 8 հանցագործություններով նրան Մեքսիկայի դատարանում դատելու անհրաժեշտության մասին կետը:
Մեսան նաեւ շնորհակալություն է հայտնել Մեքսիկայի ներկայիս նախագահ Անդրես Մանուել Լոպես Օբրադորին աջակցությանհ համար, որը նա խոստացել է ցույց տալ Գաճաճի ընտանիքին: Փետրվարի վերջին Օբրադորը խոստացել էր թմրաբարոնի հարազատներին օգնել ստանալ հումանիտար վիզաներ ԱՄՆ ուղեւորվելու եւ նրան տեսակցելու համար: