Էրզրումում «վրացական պատմական ժառանգության» անվան տակ պատրաստվում են վերակառուցել հայկական Օշավանք եկեղեցին (լուսանկարներ)
Այժմյան Թուրքիայի տարածքում գտնվող Էրզրումի նահանգի Ուզունդերե շրջանում գտնվող հայկական Օշավանք եկեղեցին կվերակառուցվի զբոսաշրջային նպատակներով, այս մասին հայտարարել է Էրզրումի նահանգապետ Օքայ Մեմիշը՝ տարածք կատարած այցի ժամանակ:
Ինչպես գրում է թուրքական պետական «Անադոլու» գործակալությունը, նահանգապետն Ուզունդերե շրջանի ղեկավարի ու համանուն շրջկենտրոն-քաղաքի քաղաքապետի հետ շրջել է Էրզրումի պատմամշակութային վայրերով՝ քննարկելով տարածքում ներդրումային մի շարք խոշոր ծրագրեր:
12-րդ դարում կառուցված հայկական Օշավանքը (հայտնի է նաև Օշվանք, Օշկվանք անուններով) թուրք նախարարը ներկայացրել է որպես «վրացիներից մնացած ժառանգություն» և խոստացել այն դարձնել զբոսաշրջային կենտրոն: