Արտոնյալ վարկերի միջոցով խրախուսելու ենք, որ մի քանի տարվա ընթացքում ունենանք կայացած միջին խավ. Պապիկյան
Տնտեսական հեղափոխության հիմքում պետք է դրվի աշխատանքի նկատմամբ հարգանքը: Այս մասին, այսօր՝ մարտի 1-ին, ԱԺ-ում լրագրողների հետ զրույցում նշեց Տարածքային կառավարման եւ զարգացման նախարար Սուրեն Պապիկյանը:
Նրա խոսքով, Կառավարությունն իր հերթին քայլեր է ձեռնարկելու այդ ուղղությամբ. «Հարկային փոփոխությունները դրա խոսուն վկայությունն է լինելու: Սկսնակ բիզնեսի համար արտոնյալ վարկերի միջոցով խրախուսելու ենք, որ մի քանի տարվա ընթացքում ունենանք կայացած միջին խավ»:
Հարցին, թե ի՞նչ տնտեսական հեղափոխություն կարող է անել գյուղացին, որը եղանակային պայմանների պատճառով վնաս է կրում ու կանգնում փաստի առջեւ, նախարարը պատասխանեց. «Մեր ամենօրյա աշխատանքը միտված է այդ մարդկանց աշխատանքը հեշտացնելուն, որ ջուրը հասանելի լինի բոլորին, մշակում ենք նոր ջրամբարներ ունենալու մեխանիզմներ»: