Ուելսում լողափին մետաղադրամներով պատված ծառ են հայտնաբերել
Ուելսում լողափին մի քանի հարյուր մետաղադրամներով պատված ծառ են հայտնաբերել։ Սա տարակուսանքի մեջ է գցել ծառը հայտնաբերող տարեց զույգին։ Մետաղադրամներից որոշները բավական հին են՝ հայտնում է BBC-ն։
Ամենայն հավանականությամբ, դա «ցանկությունների ծառի» մի կտոր է։ Բրիտանիայում մի քանի հարյուր տարվա ավանդույթ կա՝ մարդիկ մետաղադրամ են խցկում ծառի կեղեւի մեջ, որպեսզի հաջողությունն իրենց ուղեկցի։
Ծառը շատ հին մշակույթներում ոգիների կացարան է համարվում, որոնք կարող են մարդկանց օգնության գալ, եթե որոշակի ծեսեր կատարվեն։ Այս նախապաշարմունքի արձագանքն է համարվում փայտին խփելը, որպեսզի վատ երեւույթները կանխվեն։
Մեդաղադրամը ծառի մեջ մտցնելը խիստ բրիտանական սովորույթ է։ Նախկինում այդպիսի ծառեր գտնվում էին բրիտանական կղզիների ողջ տարածքում։ Դրանց մեջ մի քանի հարյուր տարեկան ծառեր կան։