Հանուն Գեներալի փրկության. Daily Mail-ը պատմել է արջին ատամնացավից փրկելու համար Մեծ Բրիտանիայից Հայաստան հասած բժշկի մասին (լուսանկարներ)
Բրիտանական Daily Mail պարբերականն ուշագրավ անդրադարձ է կատարել Մեծ Բրիտանիայից Հայաստան հասած ատամնաբույժին, որը հազարավոր կիլոմետրեր է անցել՝ 190 կգ քաշով արջի ցավացող ատամները հեռացնելու համար:
Ինչպես պարզվում է՝ կենդանին տևական ժամանակ անազատության մեջ է պահվել, այն էլ՝ դաժան պայմաններում:
Ատամնաբույժ Փոլ Կասարը Երևան է ժամանել կենդանու ատամներից չորսը հեռացնելու ու թարախակալած լինդը բուժելու համար:
Սկզբում նա քնեցրել է Գեներալ մականունով արջին, ցավազրկողի մեծ չափաբաժին ներարկել, ինչից հետո սկսել է 4-ժամանոց գործողությունը: Վիրահատությունը տեղի է ունեցել Երևանի կենդանաբանական այգում:
Բժիշկ Կասարին օգնել է International Animal Rescue բրիտանական բարեգործական կազմակերպությունը ներկայացնող անասնաբույժների խումբը:
«Իհարկե, սա մի քիչ տարբերվում է իմ նորմալ աշխատանքից, սակայն երբ գործ ունես էկզոտիկ կենդանու հետ, ոչինչ չի կարող նորմալ լինել: Այնուամենայնիվ, բոլոր դժվարություններից անկախ, նա արդեն լավ է իրեն զգում ու ձերբազատվել է տանջող ցավից»,-նշել է բժիշկը:
Նշվում է, որ արջը 19 տարեկան է ու նախքան այս պահվել է մասնավոր գազանանոցում՝ «պատկանելով ՀՀ բանակի նախկին գեներալի ու քաղաքական գործչի»: