Պորոշենկոն մինչև 1997թ. ուկրաիներեն չի խոսել
Ուկրաինայի նախագահ Պյոտր Պորոշենկոն խոստովանել է, որ մինչև 1997թ. միայն ռուսերեն էր գրում ու կարդում և չէր օգտագործում ուկրաիներենը, հաղորդում է Українська правда-ն:
«Ես վառ օրինակն եմ նրա, թե ինչպես ռուսախոսը կարող է սովորել ուկրաիներեն խոսել, եթե դրա կարիքը լինի»,- ասել է Պորոշենկոն Դնեպրում ուսանողների հետ հանդիպման ժամանակ:
Նա նշել է, որ փոքր ժամանակ շփվել է ռուսերենով ու ուկրաիներենով, իսկ դպրոցում ուսուցումը միայն ռուսերենով է եղել:
Նախագահի խոսքով՝ այժմ ուկրաիներենն իրեն շատ ավելի հեշտ է տրվում, սակայն գրելու առումով ռուսերենին ավելի լավ է տիրապետում:
Պորոշենկոն նաև հիշեցրել է, որ 5 օտար լեզվի է տիրապետում: «Այժմ, երբ Արևելյան Եվրոպա եմ գնում, թարգմանչի կարիք չեմ զգում: Կուզենայի, որ բոլոր ուկրաինացիները կարողանային այդպես շփվել», - ասել է նա:
Հիշեցնենք, որ հոկտեմբերին Ուկրաինայի խորհրդարանը առաջին ընթերցմամբ ընդունել է օրենքի նախագիծ, որը նախատեսում է կյանքի բոլոր բնագավառներում բացառապես ուկրաիներեն խոսքի կիրառումը: