Լուկաշենկոն և Պուտինը Սերժ Սարգսյանին առաջարկել են Ադրբեջանին տալ Արցախի 5 շրջանը
Բելառուսի նախագահ Ալեքսանդր Լուկաշենկոն լրագրողների հետ զրույցում հայտնել է, որ ինքը և Ռուսաստանի Դաշնության նախագահ Վլադիմիր Պուտինը ՀՀ երրորդ նախագահ Սերժ Սարգսյանին առաջարկել են Ադրբեջանին հանձնել Արցախի 5 շրջանը, հայտնում է բելառուսական BelTA գործակալությունը։
«Ես ուղիղ ասել եմ նրան, որ այդ 7 շրջանն օկուպացված է։ Ես և Պուտինը միասնական դիրքորոշում ենք հայտնել. մենք առաջարկել ենք, որ ՀՀ-ն Ադրբեջանին հանձնի 5 շրջանը, ինչու ոչ։ Նա ասաց (Սերժ Սարգսյանը-խմբ.), որ եթե վերադարձնի այդ տարածքները, Ադրբեջանը կարգելափակի ճանապարհը, կօկուպացնի Ղարաբաղը։ Պուտինը և ես խոստացել ենք, որ մենք կտեղակայենք մեր զորքերն այնտեղ, և նման բան թույլ չենք տա։ Նա հրաժարվեց», — պատմել է Լուկաշենկոն։
Ավելի վաղ Բելառուսի նախագահ Ալեքսանդր Լուկաշենկոն ուշագրավ մանրամասներ է հայտնել Հավաքական անվտանգության կազմակերպության պայմանագրի (ՀԱՊԿ) գլխավոր քարտուղարի շուրջ ստեղծված իրավիճակի մասին։
Նա ասել է, որ ներողություն է խնդրել ՀՀ վարչապետի պաշտոնակատար Նիկոլ Փաշինյանից՝ գլխավոր քարտուղարի նշանակման հարցի շուրջ վեճի համար։