Բելառուսին չպետք է հանդիմանել, որ Ադրբեջանին զենք է վաճառում. Լուկաշենկո
Բելառուսին չպետք է հանդիմանել, որ Ադրբեջանին զենք է վաճառում: Այս մասին հայտարարել է Բելառուսի նախագահ Ալեքսանդր Լուկաշենկոն Մինսկում ռուսական լրատվամիջոցների հետ հանդիպման ժամանակ, փոխանցում է ԲԵԼՏԱ-ն:
Նրա խոսքով՝ «Պոլոնեզ» հրթիռային համալիրների փորձակմանը Բելառուս է հրավիրել թե՛ հայերին, թե՛ ադրբեջանցիներին, թե՛ ռուսներին, եւ նրանք հնարավորություն ունեին համոզվելու, որ դա իսկապես բարձր ճշգրտության զենք է:
«Ադրբեջանցիները խնդրում են՝ վաճառեք,- շարունակել է նա: - Իսկ մենք պետք է դրա համար վերցրած վարկը վերադարձնենք: Եվ ես այդ ժամանակ ասացի, որ ադրբեջանցիներին կվաճառեմ: Հայերին էլ առաջարկեցի համանման համալիր: Հայերը հրաժարվեցին՝ վկայակոչելով այն, որ ռուսական «Իսկանդեր» ունեն, այն շքերթի ժամանակ ցուցադրել են: Եվ մենք ադրբեջանցիների խնդրանքով նրանց համար համալիրը հասցրեցինք պատրաստել շքերթին: Ահա թե որն է, հավանաբար, իմ մեղքը՝ որ ես ջանացել եմ այդ համալիրը շքերթի համար պատրաստել: Բայց չէ՞ որ ես նաեւ հայերին եմ առաջարկել, նրանք ասացին՝ հարկավոր չէ»:
Սրանից բացի, Բելառուսի նախագահն ամփոփել է՝ ասելով, թե անկախ ամեն ինչից, ինքը լավ է վերաբերվում բոլոր երկրներին, այդ թվում՝ Հայաստանին եւ հայերին: