Ջավախքում հատուկ ջոկատայիններ են մոբիլիզացվել
Ջավախքի Փոկա գյուղում տեղի ունեցած սպանության ու դրան հետևած վրեժխնդրության գործողությունների հետևանքով առաջացած լարված վիճակը շարունակվում է: Aliq.ge-ն հայտնում է, որ Վրաստանի ներքին գործերի նախարարության հատուկ ջոկատայինները մոբիլիզացվել են շրջանում:
Սպանվածի ընտանիքի անդամներն ասում են, որ սպանության մեջ մեղադրվողը ձերբակալվելուց հետո պարբերաբար վիրավորել է սպանվածին, և հենց այդ պատճաոով է գյուղի բնակչությունը դուրս եկել նրա դեմ: Սպանվածի և սպանողի հարազատները ոստիկանությանն են անգործության մեջ մեղադրում:
Վրացական «Ռուսթավի 2» հեռուստաընկերությունը նկարահանել է, թե ինչպես է Ախալցխայի կենտրոնում կանգնեցվել մեղադրյալին մեկուսարան տեղափոխող մեքենան, սակայն ոստիկանությունը երկխոսության մեջ չի մտել տեղացիների հետ: Սպանվածի ընտանիքը պնդում է, թե ոստիկանությունը կապ ունի մեղադրյալի հետ:
Հիշեցնենք, որ դեկտեմբերի 3-ին Փոկա գյուղում հրազենային կրակոցից սպանվել էր 1985 թ. ծնված Խ.Տ.-ն: Սպանության կասկածանքով ձերբակալվել է 1986-ին ծնված Գ.Մ.-ն, նա ընդունել է մեղադրանքը, սակայն կարճ ժամանակ անց գյուղի բնակիչների մի մասը դուրս է եկել փողոց, այրել մեղադրյալի երկու տներն ու չորս ավտոմեքենաները: