Հնդիկը կալանավորվել է՝ Հայաստանում կանանց թրաֆիքինգ կազմակերպելու կասկածանքով
Հնդկական Բանգալոր նահանգի ոստիկանությունը Հայաստանում կանանց թրաֆիքինգ կազմակերպելու կասկածանքով կալանավորել է մի տղամարդու։
Բանգալորի օդանավակայանում ոստիկանությունը կանխել է Կերալա նահանգից 32 բուժքույրերի մեկնումը Հայաստան՝ իբր Ավանդական բժշկության համալսարանում գերմաներեն սովորելու համար՝ տեղեկացնում է Times of India-ն։
Ոստիկանությունում հայտնել են, որ կալանավորված Թոնի Թոմը գերմաներենի ուսուցման հայտարարություն է տվել։ Նա վստահեցրել է, որ արտասահմանում բժշկական կրթությունը շարունակելու համար անհրաժեշտ է գերմաներենի իմացություն, եւ նրանք կարող են այն սովորել Ավանդական բժշկության համալսարանում։
Կանանցից յուրաքանչյուրը դեպի Հայաստան տոմսերի եւ վիզայի համար վճարել է մոտ 420 դոլար եւ եւս 1200 դոլար՝ ուսուցման կուրսի համար։ Բոլոր տուժածները պատմել են, որ Թոմն իրենց խոստացել էր հետադարձ տոմսեր։
Ոստիկանությունում նշել են, որ թրաֆիքինգի մասին կասկածել են, երբ իմացել են, որ առաջարկվում է բժշկական համալսարան, սակայն ուսանողներին ուղարկում են գերմաներեն սովորելու։ «Մենք վստահ չենք, թե նա ինչ էր պատրաստվում անել աղջիկների հետ Հայաստանում, սակայն այդ համալսարանում նման կուրսեր չկան»,- հայտարարել են ոստիկանության ներկայացուցիչները։