Իսպանիայում ձերբակալել են «Դոն Ժուանին», որի խաբեության զոհը հարյուրավոր կանայք են դարձել
Իսպանիայի ազգային ոստիկանությունը ձերբակալել է ողջ երկրում հայտնի խաբեբա-դոնժուան Ռոդրիգո Նոգեյրային, որի զոհերի թվում հարյուրավոր կանայք կարող են լինել:
Ինչպես հայտնում է РИА Новости-ն՝ մեջբերելով ոստիկանության տվյալները, 42-ամյա Նոգեյրան հայտնի է «Դոն Խուան դե Մարին» անունով: Իր զոհերին, որոնք հիմնականում միայնակ կանայք էին, սոցցանցերում նա ներկայանում էր տասնյակ տարբեր անուններով:
Նա մշտապես փոխում էր արտաքինն ու բնակության վայրը: Խաբեբայի զոհերի ճշգրիտ թիվը հայտնի չէ, քանի որ նրանցից շատերը իրավապահ մարմիններին չեն դիմել: Ոստիկանների կարծիքով՝ նրանց թիվը կարող է հասնել հարյուրի:
Երկրի տարբեր շրջանների երեք դատարան նրան ձերբակալելու հրաման է արձակել:
Ներկայանալով որպես տարբեր մասնագիտությունների տեր՝ խաբեբան իր զոհերին փնտրել է ծանոթությունների կայքերում: Ստիպելով իր զոհին սիրահարվել իրեն՝ նա գումար էր պարտք անում՝ ասելով, որ իր բանկային քարտը ժամանակավորապես արգելափակված է, և իրեն գումար է անհրաժեշտ հարազատի բուժման համար: Ստանալով գումարը՝ նա անհետանում էր:
Ռոդրիգոյին ձերբակալել են Մադրիդում: