Պետք է ընտրել կամ պարոն Փաշինյանին, կամ ՀՀԿ-ին. Վիգեն Սարգսյան
Բացի ՀՀԿ-ից մյուս ուժերը կամ դուրս են եկել «Ելք» դաշինքի ծոցից, կամ այս ընթացքում հասցրել են ստորագրել մի շարք փոխգործակցության պայմանագրեր, որը թուլացնում է նրանց ընդդիմադիր կեցվածքի հնարավորությունը։ Այս մասին, այսօր՝ նոյեմբերի 11-ին, ՀՀԿ խորհրդի նիստից հետո լրագրողների հետ զրույցում նշեց պաշտպանության նախկին նախարար Վիգեն Սարգսյանը՝ հավելելով, որ չի կարծում, թե այդ ուժերն ընդդիմություն են։
«Ընդդիմության դաշտում մեկ հայտ կա եւ դա ՀՀԿ-ի հայտն է։ Մենք հաջորդ խորհրդարանում ընդդիմություն ունենալու ենք, թե ոչ։ Եթե պատրաստ ենք անցում կատարել միաբեւեռ համակարգի, ապա պետք է ՀՀԿ-ին չվստահել։ Եթե ուզում ենք գոնե երկու կարծիք լինի խորհրդարանում, ապա պետք է ընտրել կամ պարոն Փաշինյանին, կամ ՀՀԿ-ին»,-ընդգծեց նա։
Վիգեն Սարգսյանը անդրադառնալով ՀՀԿ-ի սխալներին, ասաց, որ դրանք բնորոշ են ցանկացած կուսակցության, որը 5 տարուց ավելի եղել է իշխանության. «ՀՀԿ-ն հեծանիվ չի հորինել եւ կրկնել այն սխալները, որոնք անում են այն կուսակցությունները, որոնք 5 տարուց ավելի լինում են իշխանության մեջ։ Ճակտագրական են միայն այն սխալները, որոնք մահացու են, ուղղելի չեն։ Մնացածի վրա պետք է աշխատել, բարելավել վիճակը»։
Նա անդրադարձավ նաեւ քարոզարշավին, ասելով, որ վստահ է, որ իշխանությունը կապահովի քարոզարշավի համար բոլոր պայմանները։