Շները կարող են որոշել մալարիայով հիվանդներին՝ գուլպաների հոտով
Դարեմի համալսարանի գիտնականները պարզել են, որ մալարիայի ախտորոշմանը կարող են օգնել շները,– հաղորդում է The Guardian-ը։ Մակաբույծ օրգանիզմներով վարակված մարդկանց մոտ միշտ չէ որ դրսևորվում են մալարիային հատուկ ախտանիշները, սակայն դրանք բոլորը յուրահատուկ հոտ ունեն։
Փորձին մասնակցել են Գամբիայի երեխաները. մալարիայով հիվանդ երեսուն դպրոցական և 143 առողջ երեխաներ։
Երեխաներին նեյլոնից գուլպաներ են բաժանել, որոնք նրանք հագել են գիշերը։ Առավոտյան գուլպաները հատուկ սառցախցիկներով Անգլիա են տեղափոխել, որտեղ լաբրադոր և լաբրադոր–ռեթրիվեր ցեղատեսակի երկու շուն մի քանի ամիսների ընթացքում սովորել էին տարբերակել մալարիան պոտենցիալ հիվանդի գուլպաների հոտով։
Արդյունքում շները 70 տոկոս ճշգրտությամբ որոշել են, թե որ գուլպաներն են պատկանել հիվանդ երեխաներին, և 90 տոկոս ճշգրտությամբ՝ թե որոնք են առողջներինը եղել։