Իսկ Մայրապետյանին ինչո՞ւ եք ձերբակալել կամ այսպիսի՞նն է ձեր «նոր» Հայաստանը
Ապրիլ-մայիսյան հայտնի իրադարձություններից, որոնց շատերը հեղափոխություն են անվանում, շատ չանցած ՀՀ քաղաքացիների մի մասը սկսեց հասկանալ, որ այն սիրո եւ համերաշխության հետ բոլորովին էլ կապ չունի:
Ավելին, պարզվեց, որ նոր իշխանությունն ունի բավական ուրույն մոտեցում բիզնեսի եւ գործարարների նկատմամբ: Այսօր նույն կառավարության, նրա ղեկավարների կողքին պտտվում են, նախկինի նման, գուցե եւ ավելի թափով իրենց գործունեությունը շարունակում մեծ ու փոքր գործարարներ, որոնց անցյալը կամ ներկան, մեղմ ասած, մաքուր չեն:
Քաղաքի սրճարաններում ակտիվ լուրեր են շրջանառվում, որ անգամ առաջին փոխվարչապետը փողոցային բառապաշար եւ վարքագիծ ունեցող այդ գործարարների հետ ակտիվ քննարկում է առաջիկա արտահերթ ընտրությունններին առնչվող հարցեր: Եւ եթե անգամ այս լուրը չհամապատասխանի իրականությանը, փաստը մնում է փաստ, որ օրենքի հետ լուրջ խնդիրներ ունեցած գործարարներն այսօր իրենց լավ են զգում:
Ընդգծենք, սակայն, որ ոչ բոլորն են նույն կարգավիճակում: Օրինակ, խոշոր եւ շատ լուրջ գործարար Սամվել Մայրապետյանը, որը մեր երկրում բավական լուրջ ներդրումներ է արել, այսօր զրկված է ազատությունից:
Ասում են, իսկ ավելի կոնկրետ, իրավապահ մարմինները հայտարարել են, թե տասը տարի առաջ Մայրապետյանն իբր միջնորդել է, որ ինչ որ մեկը կաշառք տա: Իրոք սա ծիծաղելի է, եթե ամեն ինչ այսքան տխուր չլինի:
Այսօր անգամ բարձր դասարանցիները գիտեն, որ Մայրապետյանին կալանավորել են այն նպատակով կամ հույսով, որ նա ցուցմունք տա երկրորդ նախագահի դեմ: Սա՞ է ձեր «նոր» Հայաստանը: Ինչո՞ւ եք կալանավորել Սամվել Մայրապետյանին, եթե անգամ ձեր ներկայացրած մեղադրանքը մոտ է իրականությանը: Ե՞րբ է ավարտվելու այս անհեթեթությունը:
Ի վերջո չե՞ք հասկանում, որ բիզնեսի ներկայացուցիչների, իրական բիզնեսի ներկայացուցիչների հետ այսպես վարվելը հանգեցնելու է բիզնես դաշտի լիակատար ամայացման: Ամայացավ քաղաքական դաշտը, կամայանա եւ բիզնես դաշտը:
Ձեր կողքին պահելով կրիմինալին շատ մոտ, այսպես կոչված գործարարներին, եւ ճնշելով իրական գործարարներին, ընդամենը թուլացնում եք Հայաստանը, սպանում երկրի տնտեսությունը:
Որեւէ մեկը տրամաբանական բացատրություն չի կարող տալ, թե ինչու է ազատությունից զրկվել Սամվել Մայրապետյանը, իսկ շատ ու շատ բիզնեսմենների մոտ անգամ ձեւական ստուգումներ չեն իրականացվում: Չմոռանանք, թե ով ինչ էր ասում իշխանափոխությունից առաջ:
Այս խայտառակ իրավիճակի վկայություններից մեկն էլ ՀՔԾ-ի ստուգումներն են «Տոյոտա-Երեւան» ՍՊԸ-ում։
Ինչպես ասում են, ամեն ինչ պարզ է: Պարզ չէ միայն, թե իրականում ինչ նպատակ եւ խնդիր է իր առաջ դրել կառավարությունը: Ի վերջո, այս գործելաոճը, երբ գործարարին զրկում են ազատությունից, նրանից ցուցմունք պոկելու ակնկալիքով, մեզ հեռու չի տանի: Չնայած, հայտնի հեռախոսազրույցից հանրությանն արդեն հայտնի է դարձել, թե ինչպես են կալանավորմանը մոտենում ՀՔԾ-ում:
Հակոբ Ասատրյան
Top-News.am