ԱՄՆ փոխպետքարտուղարի տեղակալը` արցախյան հակամարտության մասին
Պաշտոնական այցով ՀՀ-ում գտնվող ԱՄՆ փոխպետքարտուղարի տեղակալ Ջորջ Քենթն այսօր ԱՄՆ դեսպանությունում լրագրողների հետ հանդիպման ժամանակ խոսել է արցախյան հակամարտության մասին՝ նշելով, որ ԱՄՆ-ն հավատարիմ է ԵԱՀԿ Մինսկի խմբի առաքելությանը և չի ընդունում հակամարտության լուծման այլ հարթակ:
Հարցին, թե չի՞ պատրաստվում արդյոք ԱՄՆ-ն զենքի վաճառքի արգելք սահմանել Ադրբեջանի և Հայաստանի նկատմամբ, որպեսզի սպառազինությունների մրցավազքը կանգ առնի, ամերիկացի պաշտոնյան պատասխանել է.
«Զենքի վաճառքի հետ կապված հարցերը պետք է ուղղել ռուս, և ոչ թե ամերիկացի դիվանագետներին: Հակամարտության մարդասիրական կողմի առումով համաձայն եմ, մեծ խնդիր կա: Ես գիտեմ, որ մեծ թվով հայեր և ադրբեջանցիներ տուժել են այս հակամարտությունից: Նրանք ամեն ինչ կորցրել են և ստիպված եղել կյանքը նորից սկսել»:
Ջորջ Քենթն այնուհետև հակամարտության մասին խոսել է տարածարջանային գործընթացների տեսանկյունից՝ խուսափելով կոնկրետ արտահայտություններից կամ մեղադրանքներից: Ամերիկացի պաշտոնյայի միակ մեղադրանքը կրկին ուղղվել է Իրանին՝ որպես Սիրիայում անկայունություն ստեղծող երկիր: