Ընկերները պատմել են Շառլ Ազնավուրի վերջին օրերի մասին
Շանսոնյե Շառլ Ազնավուրի շրջապատից Le Parisien-ի հետ զրույցում պատմել են նրա վերջին օրերի մասին:
94-ամյա Ազնավուրը մահացել է հոկտեմբերի 1-ի գիշերը: Դրանից առաջ նա սեպտեմբերի 20-ին վերադարձել էր Ճապոնիայից եւ պատրաստվում էր Ֆրանսիայում ձմեռային համերգաշրջանին: Ընտանիքում պատմում են, որ դեռեւս սեպտեմբերի 28-ին երգիչը հոյակապ վիճակում էր: «Նա երեքշաբթի պետք է Հայաստան մեկներ Ֆրանկոֆոնիայի շաբաթին մասնակցելու: Ամեն ինչ լավ էր»,- ասել է Ազնավուրի մտերիմների շրջանում աղբյուրը:
Ազնավուրի վաղեմի ընկեր եւ հրատարակիչ Ժերար Դավուի խոսքով՝ արտիստն իր վերջին օրն անցկացրել է գրքի վրա աշխատելով: «Կիրակի Շառլը մինչեւ ուշ ժամ գրում էր: Նա աշխատում էր իր չորրորդ հուշագրության վրա: Ինձ ասում էր, որ դա վերջինն է լինելու»,- ասել է Դավուն:
Ազնավուրը նաեւ նոր ալբոմ էր ձայնագրում: «Նա ձայնագրությունը գրեթե ավարտել էր եւ ցանկանում էր այն թողարկել մյուս տարի: Ինչպես սովորաբար, ստեղծել էր 20-25 երգ, որ միայն կեսը թողնի»,- պատմել է հրատարակիչը:
Լուրեր Հայաստանից - NEWS.am