Ադրբեջանցի պատգամավորը Ռուսաստանին մեղադրել է «ադրբեջանական հողերի օկուպացիայի մեջ»
Ադրբեջանցի պատգամավոր Գուդրատ Հասանգուլիեւը Ռուսաստանին մեղադրել է «ադրբեջանական հողերի օկուպացիայի մեջ»։ Իր առանձնահատուկ կարծիքն ադրբեջանցի պատգամավորը հայտնել է Միլի մեջլիսի նիստին։
«Մեր հողերը Ռուսաստանն է օկուպացրել»,–հայտարարել է Հասանգուլիեւը՝ առաջարկելով օրինագիծ մշակել օկուպացված հողերի մասին։ Պատգամավորի խոսքով՝ օկուպացված տարածքների բնական ռեսուրսներն են շահագործվում։
Գուդրատ Հասանգուլիեւը համոզված է՝ ադրբեջանական հողերը օկուպացրել է ոչ թե Հայաստանը, այլ ՌԴ–ն. «Հաճախ են ասում, որ Ադրբեջանը չի կարող Հայաստանի հետ մրցել։ Մեր հողերը օկուպացրել է Ռուսաստանը։ Որքան էլ մեր ռազմական ներուժն ավելացնենք, չենք կարող ազատագրել մեր հողեր, քանի դեռ ՌԴ–ն ռազմական աջակցություն է ցուցաբերում Հայաստանին։ Իսկ այդ երկրների ռազմական համագործակցությունը կարող է մեր նոր հողերի կորստի պատճառ դառնալ»,–հայտարարել է պատգամավորը։