ԱՄՆ-ը դատապարտել է Իրանում տեղի ունեցած ահաբեկչությունը
Միացյալ Նահանգները դատապարտել է երեկ Իրանում զորահանդեսի ընթացքում տեղի ունեցած ահաբեկչությունը, որի հետևանքով սպանվել է առնվազն 25 և վիրավորվել է շուրջ 60 մարդ:
Իրանի իշխանությունը հայտարարել է, թե այդ ահաբեկչությունն «իրականացրել են Ամերիկայի խամաճիկները»:
ԱՄՆ Պետական դեպարտամենտը հայտարարել է, որ «Ամերիկայի ժողովուրդը ահաբեկչության դեմ պայքարում սատարում է Իրանի ժողովրդին և ցավակցություն է հայտնում այդ դժբախտության կապակցությամբ»:
Ահաբեկչությունը տեղի է ունեցել Ահվազ ավանում, որտեղ հեղափոխական գվարդիայի զորահանդեսի ժամանակ զինվորական զգեստներով չորս զինյալներ թիկունքից կրակ են բացել զորահանդեսի մասնակիցների և հանդիսատեսների վրա:
Զոհվել են ոչ միայն զինծառայողներ, այլև՝ հանդիսատեսներ, այդ թվում՝ կանայք և երեխաներ:
Ըստ իրանական լրատվամիջոցների, պատասխան կրակի արդյունքում չորս զինյալներից երեքը տեղում ոչնչացվել են, իսկ չորրորդը վիրավորվել ու մահացել է հիվանդանոցում: