Լենինը ցանկանում է խոչընդոտել Հիտլերին քաղաքապետ դառնալու հարցում
Պերուի Յունգար քաղաքի քաղաքապետի պաշտոնին հավակնում է Հիտլեր Ալբա Սանչես անունով քաղաքական գործիչը: Դա առաջացրել է իր հայրենակից Լենին Վլադիմիր Ռոդրիգես Վալվերդեի վրդովմունքը, գրում է ria.ru-ն՝ պերուական RPP ռադիոյին հղումով:
Ռոդրիգես Վալվերդեն դիմել է ընտրական մարմիններին՝ պահանջելով չգրանցել Հիտլերի թեկնածությունը:
Քաղաքական գործիչը հայտնել է, որ չգիտի Լենին անունով այդ մարդու գոյության մասին, և կարծում է, որ նրան օգտագործում են իր հակառակորդները, որոնք պաշտպանում են այլ թեկնածուի շահերը:
Հիտլեր Ալբա Սանչեսը ներկայացնում է աջակողմյան «Մենք ենք Պերուն» կուսակցությունը: 2011-2014 թվականներին նա արդեն զբաղեցրել է Յունգարի քաղաքապետի պաշտոնը կենտրոնամետ «Պերուի հնարավորությունները» կուսակցությունից:
«Ես լավ Հիտլեր եմ»,- ասել է նա:
Թեկնածուն խոստովանել է, որ իր անվան պատճառով բազմիցս խտրական վերաբերմունքի է բախվել և որոշել է անգամ փոխել իր անունը, սակայն հետո հետ է կանգնել նման որոշումից՝ հորը չնեղացնելու համար:
«Հայրս չի իմացել Հիտլերի պատմության մասին, այդպես է անվանակոչել, քանի որ անունս էկզոտիկ հնչեղություն ունի»,- ասել է քաղաքական գործիչը: