Ադրբեջանը հերթական անգամ խախտել է միջազգային պարտավորությունները. ԱԳՆ
Ադրբեջանը հերթական անգամ խախտել է միջազգային պարտավորությունները։ Այս մասին հայտնել է ԱԳՆ մամուլի քարտուղար Տիգրան Բալայանը՝ NEWS.am–ի թղթակցի խնդրանքով մեկնաբանելով ադրբեջանական կողմի հաղորդագրությունը լայնամասշտաբ զորավարժություններ անցկացնելու մասին։
«Սա հերթական խախտումն է։ Անցկացվելու են խոշոր զորավարժություններ զորքերի ներգրավմամբ։ Ադրբեջանական կողմն իր միջազգային պարտավորություններին համապատասխան պարտավոր էր տեղեկացնել ԵԱՀԿ երկրներին»,–նշել է Բալայանը։
Ավելի վաղ հայտնել էինք, որ Ադրբեջանում սեպտեմբերի 17-22-ը լայնածավալ օպերատիվ-տակտիկական զորավարժություններ կանցկացվեն: Զորավարժություններին կմասնակցի մոտ 20.000 զինծառայող, ավելի քան 200 միավոր տանկ եւ այլ զրահատեխնիկա, տարբեր տրամաչափի ավելի քան 120 հրթիռահրետանային կայանքներ, համազարկային կրակի ռեակտիվ համակարգեր եւ ականանետներ, մինչեւ 10 միավոր կործանիչ ու ռմբակոծիչ, մինչեւ 20 միավոր տարբեր նշանակության բանակային ավիացիա։