Հայտնի է Պուտինի ու Ալիևի հանդիպման ամսաթիվը
Ռուսաստանի նախագահ Վլադիմիր Պուտինը սեպտեմբերի 25-ին կայցելի Ադրբեջան: Այդ մասին հայտնել է ԱՊՀ, եվրասիական ինտեգրման և հայրենակիցների հետ կապերի հարցերով ՌԴ պետդումայի հանձնաժողովի ղեկավար Լեոնիդ Կալաշնիկովը «Ռուս-ադրբեջանական հարաբերությունների նոր փուլ» թեմայով Բաքու-Մոսկվա տեսակամրջի ընթացքում, հաղորդում է minval.az-ը:
«Ադրբեջանի և Ռուսաստանի նախագահներ Իլհամ Ալիևը և Վլադիմիր Պուտինը սեպտեմբերի 25-ին Բաքու Ռուսաստանի նախագահի այցի շրջանակում աշխատանքային հանդիպում կունենան, որի ընթացքում կքննարկվեն հարցեր, որոնց մասին կողմերը պայմանավորվածություն են ձեռք բերել կամ որոնց շուրջ չեն պայմանավորվել Սոչիում սեպտեմբերի 1-ին կայացած բանակցությունների ընթացքում»,- ասել է Կալաշնիկովը:
Ավելի վաղ Հայաստանի վարչապետ Նիկոլ Փաշինյանը «Կոմերսանտ»-ին տված հարցազրույցում հայտնել էր, որ Վլադիմիր Պուտինին հրավիրել է Երևան, և վերջինս ընդունել է հրավերը:
Նա նշել է, որ պայմանավորվել են, որ այցը կկայանա մոտ ապագայում, եթե ոչ մինչև տարեվերջ, ապա հաջորդ տարվա սկզբին: