Turkish Airlines–ը բոյկոտելու է ամերիկյան ընկերությունների գովազդները
Թուրքական ազգային ավիափոխադրող Turkish Airlines–ը մտադիր է բոյկոտել ամերիկյան ընկերությունների գովազդը՝ ի պատասխան ԱՄՆ պատժամիջոցների, հայտնել է ավիաընկերության մամուլի քարտուղար Յախյա Ուստյունը, փոխանցում է «ՌԻԱ Նովոստի»–ն։
Ամերիկյան գովազդների բոյկոտի կոչը երկուշաբթի օրվանից տարածվում է սոցցանցերի թուրք օգտատերերի շրջանում։ Երեքշաբթի նախագահ Թայիփ Էրդողանը հայտարարել է, որ իր երկիրը բոյկոտ կհայտարարի ամերիկյան էլեկտրոնային արտադրանքներին։
Ուստյուն թվիթերյան իր էջում տեղադրել է #ABDyeReklamVerme («Մի՛ թույլատրեք ամերիկյան գովազդը») հեշթեգը՝ կոչ անելով մյուս թուրքական ընկերություններին միանալ ակցիային։
Հիշեցնենք, որ թուրքական լիրան վերջին ամիսներին հասել է պատմական նվազագույն մակարդակի դոլարի և եվրոյի նկատմամբ, տարվա սկզբից այն այդ փոխարժեքների նկատմամբ արժեզրկվել է ավելի քան 40 տոկոսով։
ԱՄՆ–Թուրքիա հարաբերությունները վերջին ժամանակներս սրվել են, այդ թվում՝ ամերիկացի պաստոր Էնդրյու Բրանսոնի գործի պատճառով, որը ձերբակալվել է 2016 թվականին թուրքական իշխանությունների կողմից։ Օգոստոսի սկզբին ԱՄՆ ֆինանսների նախարարությունը պատժամիջոցներ է սահմանել Թուրքիայի արդարադատության նախարար Աբդուլհամիդ Գյուլի և ՆԳ նախարար Սուլեյման Սոյլուի նկատմամբ՝ մեղադրելով նրանց մարդու իրավունքների լուրջ խախտումների մեջ։