Փչացնելով քվեաթերթիկը կամ չմասնակցելով ընտրություններին դուք նպաստում եք Սերժ Սարգսյանի վերարտադրությանը (Տեսանյութ)
Վերջին շրջանում Հայաստանում շատ է խոսվում այն մասին, որ ընտրություններին մասնակցելն իմաստ չունի, և ավելի լավ է կամ չգնալ ընտրություններին, կամ գնալ ու փչացնել քվեաթերթիկը՝ քվեարկելով, օրինակ, Չակ Նորիսի օգտին։ Այո, սա նույնպես տարբերակ է, տարբերակ է ցույց տալու վերաբերմունքը թե իշխանության և թե ընդդիմության հանդեպ,սակայն ամեն փչացրած քվեաթերթիկ էլ ավելի իրական է դարձնում Սերժ Սարգսյանի և ՀՀԿ-ի վերարտադրությունը։
Քանի որ Հայաստանն այսօր արդեն խորհրդարանական կառավարման մոդելին է անցել, ԱԺ ընտրություններն էլ դարձել են միակ համապետական ընտրությունները, դրա կարևորությունն էլ ավելի է մեծացել։ Ապրիլի 2-ի ընտրություններով ձևավորվելու է ոչ միայն օրենսդիր մարմինը, այլ դրանով ձևավորվելու է նաև գործադիրը, նոր ԱԺ-ն ընտրելու է նաև նոր նախագահին։ Եթե նոր խորհրդարանում չլինի քաղաքական ուժերի հավասարակշռություն, այլ շարունակվի մեկ անձի և մեկ կուսակցության մենաշնորհը, ապա այն խնդիրները, որոնցում թաղված է Հայաստանը էլ ավելի կխորանան։
Եթե դուք չեք մասնակցելու ընտրություններին, կամ փչացնելու եք քվեաթերթիկը, իմացեք, որ Սերժ Սարգսյանն էլ ավելի մեծ հավանականությամբ կշարունակի իշխել Հայաստանում, կշարունակի չկատարել իր խոստումները, իսկ փոփոխությունները մեր երկրում կհետաձգվեն ևս մի քանի տարով։
Մանրամասները՝ տեսանյութում