Մինսկը պնդում է, որ ազատ է արձակել այս շաբաթ ձերբակալված բոլոր լրագրողներին
Բելառուսի քննիչները երեկ ուշ երեկոյան հայտարարել են, որ ազատ են արձակել այս շաբաթ ձերբակալված բոլոր լրագրողներին, որոնք կասկածվում են պետական «ԲելՏԱ» լրատվական գործակալության համակարգչային ցանցերը կոտրելու և ապօրինի տեղեկություններ ստանալու մեջ: Այդուհանդերձ, որոշ անկախ լրագրողներ շարունակում են անազատության մեջ մնալ:
Ազատ արձակված լրագրողներից Մարինա Զոլատավան «Ազատություն» ռադիոկայանին ասել է, որ մեկուսարանում իրեն լավ են վերաբերվել, սակայն մեղադրանք են առաջադրել պաշտոնեական անփութություն դրսևորելու մեջ, ինչը կարող է հանգեցնել հինգ տարվա ազատազրկման:
Իրավապաշտպանները պնդում են, որ այս գործը անկախ մամուլի դեմ հերթական ճնշումն է բռնապետական կառավարմամբ հայտնի նախագահ Ալեքսանդր Լուկաշենկոյի կողմից: